nahīñ nigāh meñ manzil to justujū hī sahī
nahīñ visāl mayassar to aarzū hī sahī
na tan meñ ḳhuun farāham na ashk āñkhoñ meñ
namāz-e-shauq to vājib hai be-vazū hī sahī
kisī tarah to jame bazm mai-kade vaalo
nahīñ jo bāda-o-sāġhar to hāv-hū hī sahī
gar intizār kaThin hai to jab talak ai dil
kisī ke vāda-e-fardā kī guftugū hī sahī
dayār-e-ġhair meñ mahram agar nahīñ koī
to 'faiz' zikr-e-vatan apne rū-ba-rū hī sahī