ham musāfir yūñhī masrūf-e-safar jā.eñge
be-nishāñ ho ga.e jab shahr to ghar jā.eñge
kis qadar hogā yahāñ mehr-o-vafā kā mātam
ham tirī yaad se jis roz utar jā.eñge
jauharī band kiye jaate haiñ bāzār-e-suḳhan
ham kise bechne almās-o-guhar jā.eñge
nemat-e-zīst kā ye qarz chukegā kaise
laakh ghabrā ke ye kahte raheñ mar jā.eñge
shāyad apnā bhī koī bait hudī-ḳhvāñ ban kar
saath jā.egā mire yaar jidhar jā.eñge
'faiz' aate haiñ rah-e-ishq meñ jo saḳht maqām
aane vāloñ se kaho ham to guzar jā.eñge