jaane phir tum se mulāqāt kabhī ho ki na ho

khul ke dukh-dard kī kuchh baat kabhī ho ki na ho

phir hujūm-e-ġham-o-jazbāt kabhī ho ki na ho

tum se kahne ko koī baat kabhī ho ki na ho

aaj to ek hī kashtī meñ haiñ mañjdhār meñ ham

phir ye majbūri-e-hālāt kabhī ho ki na ho

ahd-e-māzī ke fasāne hī sunā leñ tum ko

itnī ḳhāmosh koī raat kabhī ho ki na ho

jo jalātā hai mire ġham ke añdheroñ meñ charāġh

mere hāthoñ meñ vahī haat kabhī ho ki na ho