sab pech-o-tāb-e-shauq ke tūfān tham ga.e

vo zulf khul ga.ī to havāoñ ke ḳham ga.e

saarī fazā thī vādī-e-majnūñ kī ḳhvāb-nāk

jo rūshanās-e-marg-e-mohabbat the kam ga.e

vahshat sī ek lāla-e-ḳhūnīñ kafan se thī

ab ke bahār aa.ī to samjho ki ham ga.e

ab jin ke ġham kā terā tabassum hai parda-dār

āḳhir vo kaun the ki ba-mizhgān-e-nam ga.e

ai jāda-e-ḳhirām-e-mah-o-mahr dekhnā

terī taraf bhī aaj havā ke qadam ga.e

maiñ aur tere band-e-qabā kī hadīs-e-ishq

nā-dīda ḳhvāb-e-ishq ka.ī be-raqam ga.e

aisī koī ḳhabar to nahīñ sākinān-e-shahr

dariyā mohabbatoñ ke jo bahte the tham ga.e