koī tum jaisā thā aisā hī koī chehrā thā
yaad aatā hai ki ik ḳhvāb kabhī dekhā thā
raat jab der talak chāñd nahīñ niklā thā
merī hī tarah se saaya bhī mirā tanhā thā
jaane kyā soch ke tum ne mirā dil pher diyā
mere pyāre isī miTTī meñ mirā sonā thā
vo bhī kam-baḳht zamāne kī havā le ke ga.ī
merī āñkhoñ meñ mirī mai kā jo ik qatra thā
tū na jaagā magar ai dil tire darvāze par
aisā lagtā hai koī pichhle pahar aayā thā
terī dīvār kā saaya na ḳhafā ho mujh se
raah chalte yūñhī kuchh der ko aa baiThā thā
ai shab-e-ġham mujhe ḳhvāboñ meñ sahī dikhlā de
merā sūraj tirī vaadī meñ kahīñ Duubā thā
ik mirī aañkh hī shabnam se sharābor rahī
sub.h ko varna har ik phuul kā muñh sūkhā thā
tum zarā thaam lo aa kar kabhī paimāna-e-jāñ
dekho dekho mire hāthoñ se abhī chhūTā thā