mujhe aziiz hai ye nik.hatoñ kā gahvārā

ḳhudā kare na mile tere ġham se chhuTkārā

kalī kalī tirī doshīzgī kī ḳhushbū hai

chaman chaman tirī rānā.iyoñ kā nazzārā

qadam qadam tire āb-e-hayāt ke chashme

ravish ravish tirī jū-e-ḳhirām kā dhārā

nafas nafas tire kūche meñ ek aalam hai

yahāñ se lauT ke jaane kā ab kise yaarā

galī galī mirī rusvā.iyoñ ke charche haiñ

kahāñ kahāñ liye phirtī hai bū-e-āvārā