talāsh jis ko maiñ kartā phirā ḳharāboñ meñ
milā vo shaḳhs mujhe raat mere ḳhvāboñ meñ
maiñ us ko ġhurfa-e-dil meñ bhalā chhupā.ūñ kyā
jo lafz lafz hai bikhrā huā kitāboñ meñ
dam-e-visāl tirī aañch is tarah aa.ī
ki jaise aag sulagne lage gulāboñ meñ
vo aañkh jis se ġhazal merī iktisāb huī
vo aañkh jāgtī rahtī hai mere ḳhvāboñ meñ
mahak jo uThtī hai 'anvar-sadīd' us gul se
kahāñ vo taaza mahak kāġhzī gulāboñ meñ