tesha-ba-kaf ko ā.ina-gar kah diyā gayā
jo aib thā use bhī hunar kah diyā gayā
saaya hai pyaar kā na mohabbat kī dhuup hai
dīvār ke hisār ko ghar kah diyā gayā
in ke har ek goshe meñ sadiyāñ muqīm haiñ
TuuTī imāratoñ ko khañDar kah diyā gayā
ḳhuddārī-e-anā hai na pindār-e-zīst hai
shānoñ ke saare bojh ko sar kah diyā gayā
āñgan meñ har makāñ ke añdheroñ kā raaj hai
mahloñ kī raushnī ko sahar kah diyā gayā
kuchh ḳhauf-e-jāñ hai aur na kuchh fikr-e-hijr-e-yār
ḳhush-gāmiyoñ ko ranj-e-safar kah diyā gayā
hairat daroġh maslahat-āmez par ho kyā
be-barg jhāḌiyoñ ko shajar kah diyā gayā
dekhā kahāñ hai aag ke dariyāoñ kā safar
jugnū uḌe to raqs-e-sharar kah diyā gayā
kuchh ehtirām-o-husn-e-aqīdat ke josh meñ
har naqsh āb-e-naqsh-e-hajar kah diyā gayā
khul jā.egā bharam tirī mīzān-e-adl kā
do ek harf-e-jurm agar kah diyā gayā
nā-āshnā-e-naqsh-e-kaf-e-pā-e-ām hai
vo rāsta bhī rāhguzar kah diyā gayā
yuuñ ḳhush haiñ jaise vāqi.atan ho ga.e ḳhudā
majbūriyoñ ke zer-e-asar kah diyā gayā
'anjum' yahāñ tak aane meñ kyā kyā guzar ga.ī
mohr-e-sar-e-mizha bhī guhar kah diyā gayā