kab is meñ shak mujhe hai jo lazzat hai qaal meñ
lekin vo baat is meñ kahāñ hai jo haal meñ
dil hai mirā ki mārka-e-kufr-o-dīñ koī
ik umr kaT ga.ī hai javāb o savāl meñ
allāh re be-ḳhudī ki tire ghar ke ās-pās
har dar pe dī sadā tire dar ke ḳhayāl meñ
do naam ek kaifiyat-e-jazb-e-dil ke haiñ
bas farq is qadar hai firāq o visāl meñ
aa.e vo kitnī baar nigāhoñ ke rū-ba-rū
us ke libās meñ kabhī us ke jamāl meñ