nashe meñ huuñ magar ālūda-e-sharāb nahīñ
ḳharāb huuñ magar itnā bhī maiñ ḳharāb nahīñ
kahīñ bhī husn kā chehrā tah-e-naqāb nahīñ
ye apnā dīda-e-dil hai ki be-hijāb nahīñ
vo ik bashar hai koī nūr-e-āftāb nahīñ
maiñ kyā karūñ ki mujhe dekhne kī taab nahīñ
ye jis ne merī nigāhoñ meñ uñgliyāñ bhar diiñ
to phir ye kyā hai agar ye tirā shabāb nahīñ
mire surūr se andāza-e-sharāb na kar
mirā surūr ba-andāza-e-sharāb nahīñ