jab dīda-e-bīnā kā havāla nahīñ miltā
phir koī bhī duniyā kā havāla nahīñ miltā
vo ālam-e-bālā to tire dil meñ makīñ hai
jis ālam-e-bālā kā havāla nahīñ miltā
aalā meñ to adnā ke havāle hī havāle
adnā hī meñ aalā kā havāla nahīñ miltā
jis jān-e-tamannā ke havāle hai mirī jaañ
us jān-e-tamannā kā havāla nahīñ miltā
ye ruuh savālāt hai yā koī munājāt
kyā miltā hai bas kyā kā havāla nahīñ miltā
ham aaj haiñ aur aaj tū hai kal se bhī aage
achchhā hai jo fardā kā havāla nahīñ miltā
paidā hai to pinhāñ ke havāloñ se bharā hai
pinhāñ se to paidā kā havāla nahīñ miltā
tū apne havāle kī havā khā ke hī ḳhush rah
har aan havāla kā havāla nahīñ miltā
behtar hai ki ab ḳhud se judā ho ke bhī dekheñ
dariyā meñ to dariyā kā havāla nahīñ miltā
'mashkūr' mirī jaan chale aa.e ho tanhā
tanhā ko to tanhā kā havāla nahīñ miltā