bātoñ ke nagar se aa rahe haiñ
ham apne hī ghar se aa rahe haiñ
lafzoñ ke tulūa kar ke āfāq
ma.anī ke safar se aa rahe haiñ
ḳhāmoshiyāñ bhar ke tan-badan meñ
ham barq o sharar se aa rahe haiñ
tāroñ ke ye jitne qāfile haiñ
imkān-e-sahar se aa rahe haiñ
in ashkoñ kā dil se kyā ta.alluq
ye sho.ale jigar se aa rahe haiñ
bhīge hue ġham meñ sar se pā tak
dariyā-e-hunar se aa rahe haiñ
jitne bhī haiñ lutf-e-jāñ ke mausam
sab dīda-e-tar se aa rahe haiñ
ye ġham ke tuyūr be-tahāshā
ik dil ke shajar se aa rahe haiñ
'mashkūr' haiñ kis ḳhayāl meñ mast
be-ḳhauf-o-ḳhatar se aa rahe haiñ