ḳhāna-e-dil kā jo tavā.if hai
qasd-e-bait-ul-haram se ḳhā.if hai
aa.ina husn ke sahīfe kā
lauh-parvāz hai sahā.if hai
gul-ruḳhoñ meñ latīfa-go haiñ hazār
par vo guldasta-e-zarā.if hai
zikr terā ba-rabb-e-ka.aba sanam
ham ko aurād hai vazā.if hai
kyā kahūñ maiñ zarāfateñ us kī
be-suḳhan ma.adin-e-zarā.if hai
nashsha-e-hosh se ye kaifiyyat
ālam-e-kaif pur-kavā.if hai
ai 'muhib' kījiye dil us kī nazar
yahī tohfa yahī tahā.if hai