be-takalluf mirā haijān banātā hai mujhe
sāmne tere kahāñ bolnā aatā hai mujhe
vo udāsī ki bikharne se nahīñ bach saktā
aur tirā lams ki chuntā chalā jaatā hai mujhe
ab mire lauT ke aane kā koī vaqt nahīñ
yuuñ bhī ab ghar se sivā kaun bulātā hai mujhe
giit hī sirf laboñ par ho to aa jaa.e bhī niiñd
vo koī aur kahānī bhī sunātā hai mujhe
qat.a kar ke bhī ta.alluq vo kahāñ chain se hai
is ke asbāb-o-dalā.el bhī ginātā hai mujhe
ḳhud se vo kaun se shikve haiñ ki jaate hī nahīñ
apne jaisoñ pe yaqīñ kyuuñ nahīñ aatā hai mujhe
aur ik baar zarā chheḌ mirī ruuh ke taar
in suroñ meñ to koī aur bhī gaatā hai mujhe
ik tirā dard hai achchhe haiñ marāsim jis se
bas vahī hai ki jo palkoñ pe biThātā hai mujhe
maiñ kisī dūsre pahlū se use kyuuñ sochūñ
yuuñ bhī achchhā hai vo jaisā nazar aatā hai mujhe
ho sabab kuchh bhī mire aañkh bachāne kā magar
saaf kar duuñ ki nazar kam nahīñ aatā hai mujhe
nā-ḳhudāoñ ne to ḳhush-fahmiyāñ baḳhshī haiñ faqat
maiñ huuñ ḳhatre meñ ye tūfāñ hī batātā hai mujhe