Shariq Kaifi

tan se jab tak sans ka rishta rahega

Shariq Kaifi

Bareilly, Uttar pradesh, India

1961

tan se jab tak saañs rishta rahegā

mere ashkoñ meñ tirā hissa rahegā

duur tak koī shanāsā ho nahīñ ho

bhiiḌ meñ achchhā magar lagtā rahegā

aise chhuTkārā nahīñ denā hai us ko

maiñ agar mar jā.ūñ to kaisā rahegā

tai to hai algāv bas ye sochnā hai

kaun rut meñ ye dukh achchhā rahegā

ḳhud se merī sulh mumkin nahīñ hai

jab talak is ghar meñ ā.īna rahegā

yuuñ to ab bistar hai aur bīmār lekin

saañs lene meñ maza aatā rahegā

maiñ ne kitne din kisī ko yaad rakkhā

vo bhī kyuuñ mere liye rotā rahegā

Top Urdushayar.com