mumkin hī na thī ḳhud se shanāsā.ī yahāñ tak
le aayā mujhe merā tamāshā.ī yahāñ tak
rasta ho agar yaad to ghar lauT bhī jā.ūñ
laa.ī thī kisī aur kī bīnā.ī yahāñ tak
shāyad tah-e-dariyā meñ chhupā thā kahīñ sahrā
merī hī nazar dekh nahīñ paa.ī yahāñ tak
mahfil meñ bhī tanhā.ī ne pīchhā nahīñ chhoḌā
ghar meñ na milā maiñ to chalī aa.ī yahāñ tak
sahrā hai to sahrā kī tarah pesh bhī aa.e
aayā hai isī shauq meñ saudā.ī yahāñ tak
ik khel thā aur khel meñ sochā bhī nahīñ thā
juḌ jā.egā mujh se vo tamāshā.ī yahāñ tak
ye umr hai jo us kī ḳhatā-vār hai 'shāriq'
rahtī hī nahīñ bātoñ meñ sachchā.ī yahāñ tak