ye aur baat duur rahe manziloñ se ham

bach kar chale hamesha magar qāfiloñ se ham

hone ko phir shikār na.ī uljhanoñ se ham

milte haiñ roz apne ka.ī dostoñ se ham

barsoñ fareb khāte rahe dūsroñ se ham

apnī samajh meñ aa.e baḌī mushkiloñ se ham

manzil kī hai talab to hameñ saath le chalo

vāqif haiñ ḳhuub raah kī bārīkiyoñ se ham

jin ke paroñ se sub.h kī ḳhushbū ke rañg haiñ

bachpan udhār laa.e haiñ un titliyoñ se ham

ab to hamāre beach kabhī dūriyāñ bhī hoñ

tañg aa ga.e haiñ roz kī nazdīkiyoñ se ham

jab bhī kahā ki yaad hamārī kahāñ unheñ

pakḌe ga.e haiñ Thiik tabhī hichkiyoñ se ham