talḳhī-e-ġham mire ehsās kā sarmāyā hai
husn se maiñ ne ye in.ām-e-vafā paayā hai
jab kabhī ishrat-e-rafta kā ḳhayāl aayā hai
maiñ nai pahroñ dil-e-be-tāb ko samjhāyā hai
haa.e ye be-ḳhudī ishq ko ma.alūm nahīñ
kaun aayā hai kab aayā hai kahāñ aayā hai
dil ko sīmāb sifat kah ke guzarne vaale
ḳhud pe taḌpā hai ki tū ne use taḌpāyā hai
kāfir-e-ishq na samjhūñ to use kyā samjhūñ
mere iḳhlās ko ik dost ne Thukrāyā hai
apnī is haar ko maiñ jiit na kyuuñ kar samjhūñ
ḳhud ko khoyā hai to ai dost tujhe paayā hai
tum mire hāl-e-pareshāñ pe na tanqīd karo
tum ne dāman kabhī kāñToñ meñ bhī uljhāyā hai
manzil-e-dil bhī vahī kū-e-malāmat bhī vahī
ishq kā jazba-e-be-tāb kahāñ laayā hai
aañkh jhapkegī to shīrāza bikhar jā.egā
kis kī āvāz thī jis ne mujhe chauñkāyā hai
jis ko kahte haiñ ġhazal us kī badaulat hī 'urūj'
ruḳh-e-urdu pe ye rañg aur nikhār aayā hai