kis muñh se karūñ maiñ tan-e-uryāñ kī shikāyat

dāmāñ kī shikāyat na garebāñ kī shikāyat

kaisā hī khaTaktā rahe dil meñ mire paikāñ

mujh se to na hogī kabhī mehmāñ kī shikāyat

itnā bhī taġhāful nahīñ achchhā kahīñ tum ko

karnī na paḌe shorish-e-pinhāñ kī shikāyat

allāh rakhe mire tasavvur ko salāmat

tujh ko to nahīñ hai shab-e-hijrāñ kī shikāyat

hoñ lañg magar vāqif-e-ādāb-e-junūñ huuñ

maiñ kufr samajhtā huuñ bayābāñ kī shikāyat

kahtī hai tirī chashm kī gardish mire hote

koī na kare gardish-e-daurāñ kī shikāyat

jaate to ho ka.abe ko ḳhudā ke liye 'mā.il'

karnā na kisī dushman-e-īmāñ kī shikāyat