abhī guzre dinoñ kī kuchh sadā.eñ shor kartī haiñ

darīche band rahne do, havā.eñ shor kartī haiñ

yahī to fikr ke jalte paroñ pe tāziyāna hai

ki har tārīk kamre meñ duā.eñ shor kartī haiñ

kahā nā thā hisār-e-ism-e-āzam khīñchne vaale

yahāñ aaseb rahte haiñ balā.eñ shor kartī haiñ

hameñ bhī tajraba hai be-gharī kā chhat na hone kā

darinde, bijliyāñ, kaalī ghaTā.eñ shor kartī haiñ

abhī gard-e-safar ke girye kī hai guuñj kānoñ meñ

abhī kyuuñ muntazir ḳhālī sarā.eñ shor kartī haiñ

hameñ sairāb rakkhā hai ḳhudā kā shukr hai us ne

jahāñ banjar zamīneñ hoñ anā.eñ shor kartī haiñ