kitne hī log dil talak aa kar guzar ga.e
ham apnī laash aap uThā kar guzar ga.e
vo yūrish alam thī ki terī galī se ham
tujh ko bhī apne jī se bhulā kar guzar ga.e
ahl-e-ḳhirad fasānoñ ke unvāñ bane rahe
ahl-e-junūñ fasāne sunā kar guzar ga.e
is ehtiyāt-e-dard kī vahshat ki ham kabhī
ḳhud ko tirī nazar se chhupā kar guzar ga.e
tū hī milā na ham hī mile apne aap ko
saa.e se darmiyān meñ aa kar guzar ga.e
ab to batāo ham ko kahāñ jāoge 'matīn'
vo kaun the jo aag lagā kar guzar ga.e