lams-e-tishna-labī se guzrī hai
raat kis jāñ-kanī se guzrī hai
us murassā nigār-ḳhāne meñ
aañkh be-manzarī se guzrī hai
ek saaya sā phaḌphaḌātā hai
koī shai raushnī se guzrī hai
lūTne vaale saath saath rahe
zindagī sādgī se guzrī hai
kuchh dikhā.ī nahīñ diyā shāyad
umr andhī galī se guzrī hai
shaam aatī thī din guzarne par
kyā huā kyuuñ abhī se guzrī hai
kitnī hañgāma-ḳheziyāñ le kar
ik sadā ḳhāmushī se guzrī hai
aañkh bīnā.ī ke ta.āqub meñ
kaisī lā-hāsilī se guzrī hai