dil meñ ik dard nihāñ ho to ġhazal hotī hai
sail-e-jazbāt ravāñ ho to ġhazal hotī hai
ġham kā ehsās javāñ ho to ġhazal hotī hai
ishq maa.il ba fuġhāñ ho to ġhazal hotī hai
un pe jab apnā gumāñ ho to nikhartā hai shu.ūr
ḳhud pe jab un kā gumāñ ho to ġhazal hotī hai
mere dil meñ jo nihāñ hai vo ġham-e-be-pāyāñ
terī āñkhoñ se ayaañ ho to ġhazal hotī hai
shab-e-furqat meñ sulagte hue ashkoñ ke tufail
zindagī sho.ala-ba-jāñ ho to ġhazal hotī hai