rah-e-talab meñ hameñ ġham pe ġham nazar aa.e

ba-qadr-e-zauq magar phir bhī kam nazar aa.e

vahīñ vahīñ mirā zauq-e-sujūd machlā hai

jahāñ jahāñ tire naqsh-e-qadam nazar aa.e

mire shu.ūr kī āñkhoñ meñ aa ga.e aañsū

mujhe asīr-e-alam jab sanam nazar aa.e

tirī talāsh meñ ye bhī maqām aayā hai

jidhar nigāh uThī sirf ham nazar aa.e

vo jalva-bār haiñ dil ke nigār-ḳhāne meñ

jo merī chashm-e-tamāshā ko kam nazar aa.e