har koī miltā hai ban kar dīvār
TuuT jā.egī magar har dīvār
maiñ bhī taqsīm na ho jā.ūñ kahīñ
uTh rahī hai mire andar dīvār
har balā sīdhī chalī aatī hai
koī hotī mire bāhar dīvār
chhoḌ kar jā.ūñ kahāñ bachchoñ ko
ab to hai mere liye ghar dīvār
dhuup se ham ko bachāne ke liye
roz phailātī rahe par dīvār
phir jazīre na mile aapas meñ
rāste meñ hai samundar dīvār
maiñ sunātā rahā dukhḌe 'ḳhāvar'
aur rotī rahī shab bhar dīvār