aag apne hī dāman kī zarā pahle bujhā lo
fursat ho to phir ham ko bhī jalne se bachā lo
ai qismat-e-fardā ke ḳhush-ā.ind ḳhayālo
rāteñ na sahī din hī mire aa ke ujālo
patthar ke sanam bhī kabhī kuchh bol sake haiñ
ai but-shikan az.hān ke ḳhāmosh savālo
tum meñ to mirā āhū-e-ḳhush-gām nahīñ hai
ai vādī-e-taḳh.ill ke gum-gashta ġhazālo
miTtī huī tasvīr meñ kyā rañg bharoge
miTnā thā jinheñ miT ga.e tum ḳhud ko sambhālo
ik dard kī daulat tumheñ ham sauñp chale haiñ
ab us ko luTā do ki hayāt apnī banā lo
bād-e-saharī phuul khilā aa.ī chaman meñ
kuchh tum bhī lahū apne shahīdoñ kā uchhālo
in rāhoñ meñ vo naqsh-e-kaf-e-pā to nahīñ hai
kyuuñ phuuT ke ro.e ho yahāñ paañv ke chhālo
chehre pe thakan bāloñ meñ gard āñkhoñ meñ surḳhī
lambā hai safar paañv ke kāñTe to nikālo
phir sā.at-e-dīdār 'vahīd' aa.e na aa.e
tasvīr banā kar unheñ āñkhoñ meñ chhupā lo