ishq ifshā ho gayā ham raushnī meñ aa ga.e

kitne parde kaam ik be-pardagī meñ aa ga.e

rāh-e-mamnūā kī jānib bhī qadam uTh hī ga.e

jis taraf aanā na thā ham be-ḳhudī meñ aa ga.e

nā-ḳhudā kā kaam bhī mauj-e-talātum ne kiyā

Dūbne vaale had-e-sāhil-rasī meñ aa ga.e

ġham kī kaifiyyat ne aañsū zeb-e-mizhgāñ kar diye

shaam hote hī sitāre raushnī meñ aa ga.e

'mānī' kah do shā.irī-juzvest-az-paiġhambarī

ham pa-e-tablīġh mulk-e-dilbarī meñ aa ga.e