na gul khile na shagūfoñ pe tāzgī aa.ī
ḳhizāñ ke ba.ad chaman meñ bahār bhī aa.ī
hujūm-e-ġham meñ kahāñ fursat-e-tabassum bhī
zarā bhī yaad nahīñ kab mujhe hañsī aa.ī
koī bhī jāda-e-nau ḳhud-baḳhud nahīñ bantā
ye baat samjhoge jis roz kaj-ravī aa.ī
maiñ ik shajar huuñ uThāte haiñ fā.eda sab log
na dushmanī mirā sheva na be-ruḳhī aa.ī
hamāre saath hamesha ye hādisa guzrā
badal ke bhes raqābat kā dostī aa.ī
zamīñ to ḳhud hī chamaktā huā sitāra hai
na jaane kaise yahāñ tīrgī chalī aa.ī
ġham-e-hayāt salāmat tujhe ḳhudā rakkhe
tire sabab ġham-e-jānāñ meñ puḳhtagī aa.ī
hazār baar sunī hausla-shikan bāteñ
mirī jabīñ pe na koī shikan kabhī aa.ī
kalī ko kaun tabassum se rok saktā hai
savāl ye hai ki phūloñ ko kyuuñ hañsī aa.ī
añdherī raat kā manzar hamesha rahtā hai
kiran ujāle kī ghar meñ kabhī kabhī aa.ī
ḳhudā ke naam pe mardum-kushī rahī jaarī
lahūluhān hī aa.ī hai jo sadī aa.ī