aib jo mujh meñ haiñ mere haiñ hunar terā hai
maiñ musāfir huuñ magar zād-e-safar terā hai
tesha de de mire hāthoñ meñ to sābit kar duuñ
sīna-e-sañg meñ ḳhvābīda-sharar terā hai
tū ye kahtā hai samundar hai qalam-rau meñ mirī
maiñ ye kahtā huuñ ki maujoñ meñ asar terā hai
tū ne raushan kiye har taaq pe furqat ke charāġh
jis meñ tanhā.iyāñ rahtī haiñ vo ghar terā hai
sañg-reze to baraste haiñ mire āñgan meñ
jis kā har phal hai rasīlā vo shajar terā hai
maiñ to huuñ sañg-e-hidāyat kī tarah istāda
haañ magar zābta-e-rāhguzar terā hai
laakh be-māya huuñ itnā bhī tahī-dast nahīñ
merī āñkhoñ ke sadaf meñ ye guhar terā hai
mujh ko tanhā.ī se raġhbat tujhe hañgāmoñ se pyaar
zulmat-e-shab hai mirī nūr-e-sahar terā hai
Dūbte haiñ jo safīne ye ḳhatā kis kī hai
tah-nashīñ mauj mirī hai to bhañvar terā hai
'ramz' har tohmat-e-nā-karda se mansūb sahī
ye magar soch le us meñ bhī zarar terā hai