dil meñ umañg āñkhoñ meñ hasrat liye phirūñ
maiñ shahr shahr terī mohabbat liye phirūñ
rusvā.iyoñ ke ḳhauf se ḳhāmoshiyoñ ke saath
maiñ dil meñ tere pyaar kī lazzat liye phirūñ
jachtā nahīñ hai koī nigāhoñ meñ in dinoñ
har-pal tire ḳhayāl kī nudrat liye phirūñ
ubhregā tere lab se kabhī harf-e-dostī
dil meñ is intizār kī hasrat liye phirūñ
'mahvar' samā.atoñ ke mile band dar mujhe
hoñToñ pe apne harf-e-shikāyat liye phirūñ