nashe meñ sahvan kar lī tauba
aisī bholī ilāhī tauba
haj meñ jab yaad aa.iiñ vo āñkheñ
tāq-e-haram par rakh dī tauba
vā.izoñ se rindoñ meñ aa.ī
phirtī hai bahkī bahkī tauba
qasmeñ khā kar phir se piinā
muñh kā nivāla Thahrī tauba
daam meñ phāñsā mauja-e-mai ne
ik jhaTke meñ TuuTī tauba
bahr-e-gunah se paar utārā
kashtī-e-rahmat Thahrī tauba
pī ke 'munīr' ab bāda-e-kausar
mast huī hai merī tauba