ā.īne ke aks se gul sā badan mailā huā
sub.h ke partav se rañg-e-yāsman mailā huā
saaf ai uryānī-e-vahshat kahe detā huuñ maiñ
post khīñchūñgā agar merā badan mailā huā
ba.ad murdan bhī takalluf se kudūrat dil meñ hai
sohbat-e-kāfūr se apnā badan mailā huā
kyā tirī talvār bhī mujh se ġhubār-ālūd thī
ḳhūn-e-dil kā rañg kyuuñ ai teġh-zan mailā huā
shā.eroñ meñ guftugū aa.ī kudūrat kī baham
saaf kahtā huuñ ki ab rañg-e-suḳhan mailā huā
vasl kī shab bātoñ bātoñ meñ mukaddar ho ga.ī
guftugū-e-bosa se rañg-e-dahan mailā huā
sāf-goī se ġhubār ā.īne meñ aayā 'munīr'
merī bātoñ se dil-e-ahl-e-suḳhan mailā huā