hatheliyoñ meñ lakīroñ kā jaal thā kitnā

mire nasīb meñ merā zavāl thā kitnā

to jañgaloñ kī tarah aag mujh meñ phail ga.ī

ragoñ meñ bahtā huā ishti.āl thā kitnā

tabhī to jaltī chaTTānoñ pe lā ke pheñk diyā

mirā vajūd havā par vabāl thā kitnā

sabhī parinde mire paas aate Darte the

maiñ ḳhushk peḌ sahī be-misāl thā kitnā

magar milā na kahīñ sātvāñ javāb ab tak

mujhe satātā huā ik savāl thā kitnā