kis se milne jaao ab kis se mulāqāteñ karo

tum akele ho dil-e-tanhā se hī bāteñ karo

phir yuuñ hī mil baiTheñ ham aur dukh bharī bāteñ kareñ

haath uThā kar ye duā māñgo munājāteñ karo

sab parinde apne apne jañgaloñ meñ kho ga.e

ab to hiltī Dāliyoñ se baiTh kar bāteñ karo

ittifāqan ham tumhāre saa.e se guzreñ kabhī

bādalo tum pyaar ke lamhoñ kī barsāteñ karo

ab to jaise is imārat ko bhī chup sī lag ga.ī

khiḌkiyo darvāzo chahko gaao kuchh bāteñ karo