gaañv gaañv ḳhāmoshī sard sab alaao haiñ
rah-rav-e-rah-e-hastī kitne ab paḌāv haiñ
raat kī adālat meñ jaane faisla kyā ho
phuul phuul chehroñ pe nāḳhunoñ ke ghaao haiñ
apne lāDloñ se bhī jhuuT bolte rahnā
zindagī kī rāhoñ meñ har qadam pe daao haiñ
raushnī ke saudāgar har galī meñ aa pahuñche
zindagī kī kirnoñ ke āsmāñ pe bhaao haiñ
chāhatoñ ke sab panchhī uḌ ga.e parā.ī or
nafratoñ ke gaañv meñ jism-jism ghaao haiñ