mas.ala aaj mire ishq kā tū hal kar de
pyaar kar TuuT ke mujh se mujhe pāgal kar de
luuT le merā sukūñ aur mujhe be-kal kar de
yuuñ simaT aa mirī bāñhoñ meñ unheñ shal kar de
dekh kar pahlī nazar meñ jo umaD aa.e the
phir se jazbāt meñ paidā vahī halchal kar de
ban ke ghanghor ghaTā mujh pe tū chhā khul ke baras
ḳhushk sahrā ko mire jism ke jal-thal kar de
kis tarah vaqt guzartā hai pata hī na chale
ibtidā aaj se kar aur use kal kar de
tere bin mujh ko adhūrā sā lage apnā vajūd
yuuñ samā mujh meñ mirā jism mukammal kar de
jhiil āñkhoñ kī mirī jaan zarā sadqa utaar
aur mire naam tū āñkhoñ kā ye kājal kar de
aur kuchh tujh se nahīñ māñgtā ai jān-e-hayāt
vaqt bas mere liye apnā har ik pal kar de
chāhtā huuñ ki na dekheñ tujhe duniyā vaale
sirf parde ke liye sāmne āñchal kar de
qabl is ke mujhe jhulsā de ġhamoñ kā sūraj
mujh pe tū apnī siyah zulfoñ kā bādal kar de
mere allāh nazar bhar ke use dekh to luuñ
phir tū chāhe mirī āñkhoñ ko muqaffal kar de
Duub jā.ūñ maiñ tire ishq-samundar meñ 'nadīm'
apnī sāñsoñ se mirī sāñsoñ ko bojhal kar de