tamannā.eñ javāñ thiiñ ishq farmāne se pahle
shagufta the ye saare phuul kumhlāne se pahle
hifāzat kī koī sūrat nikal aatī hai aksar
maiñ tum ko DhūñD hī letā huuñ kho jaane se pahle
bhalā vo log kyā jāneñ safar kī lazzatoñ ko
jinheñ manzil milī ho Thokareñ khāne se pahle
mirī vahshat mire sahrā meñ un ko DhūñDhtī hai
jo the do-chār chehre jaane pahchāne se pahle
junūñ kī manzileñ āsāñ nahīñ ye soch lenā
ka.ī gulshan paḌeñge tum ko vīrāne se pahle