ham dil o jaañ se ḳharīdār haiñ kin ke un ke
bā.is-e-garmi-e-bāzār haiñ kin ke un ke
ye ḳhudā jaane kisī ko hai ḳhabar yā ki nahīñ
ham bhī ik āshiq-e-ġham-ḳhvār haiñ kin ke un ke
maqtal-e-ishq meñ ham roz-e-azal se yaaro
bismil-e-ġham-za-e-ḳhūñ-ḳhvār haiñ kin ke un ke
thā jinheñ husn-parastī se hamesha inkār
vo bhī ab tālib-e-dīdār haiñ kin ke un ke
ham ko ayyār samajhte haiñ ye be-mehr 'nisār'
jo daġhābāz haiñ so yaar haiñ kin ke un ke