karo sāmān jhūle kā ki ab barsāt aa.ī hai

ghaTā umDī hai bijlī ne chamak apnī dikhā.ī hai

agar jhūle tū mere dil ke jhūle meñ to ai zālim

rag-e-jāñ se tire jhūle ko maiñ rassī banā.ī hai

yahāñ abr-e-siyah meñ aaj tere surḳh joḌe ne

mujhe shaam o shafaq dast-o-garebāñ kar dikhā.ī hai

idhar hai kirmak-e-shab-tāb udhar jugnū gale kā hai

ye aalam dekh kar ye baat mere jī meñ aa.ī hai

ba-qaul-e-hazrat-e-'hātim' 'nisār' us vaqt yuuñ kahiye

tirī qudarat ke sadqe kyā tamāshe kī ḳhudā.ī hai