uTh kar tire dar se kahīñ jaane ke nahīñ ham
mohtāj kisī aur Thikāne ke nahīñ ham
Thahrā hai ayādat pe safar mulk-e-adam kā
aane ke nahīñ aap to jaane ke nahīñ ham
jo tum ne lagā.ī hai vo hai qadr ke qābil
is aag ko ashkoñ se bujhāne ke nahīñ ham
lo aao suno ham se ġham-e-hijr kī hālat
guzrī hai jo ham par vo chhupāne ke nahīñ ham
ahvāl-e-shab-e-ġham pe 'rashīd' aaj vo bole
qaa.il tire is jhūTe fasāne ke nahīñ ham