āñdhī chalī to gard se har chiiz aT ga.ī
dīvār se lagī tirī tasvīr phaT ga.ī
lamhoñ kī tez dauḌ meñ maiñ bhī sharīk thā
maiñ thak ke ruk gayā to mirī umr ghaT ga.ī
is zindagī kī jañg meñ har ik mahāz par
mere muqāble meñ mirī zaat DaT ga.ī
sūraj kī barchhiyoñ se mirā jism chhid gayā
zaḳhmoñ kī sūliyoñ pe mirī raat kaT ga.ī
ehsās kī kiran se lahū garm ho gayā
sochoñ ke dā.eroñ meñ tirī yaad baT ga.ī