hoñToñ ke sahīfoñ pe hai āvāz kā chehra
saayā sā nazar aatā hai har saaz kā chehra
āñkhoñ kī guphāoñ meñ taḌaptī hai ḳhamoshī
ḳhvāboñ kī dhanak hai mire hamrāz kā chehra
maiñ vaqt ke kohrām meñ kho jā.ūñ to kyā ġham
DhūñDegā zamāna mirī āvāz kā chehra
sūraj ke badan se nikal aa.e haiñ sitāre
anjām meñ bedār hai āġhāz kā chehra
palkeñ haiñ ki sargoshī meñ ḳhushbū kā safar hai
āñkhoñ kī ḳhamoshī hai ki āvāz kā chehra