ġham saheñ yā ḳhushī ko pyaar kareñ
kaun sī chiiz iḳhtiyār kareñ
ham ba-qaid-e-qafas chaman se duur
kaise andāza-e-bahār kareñ
fasl-e-gul aa ga.ī hai ahl-e-junūñ
phir garebāñ ko taar taar kareñ
kaalī kaalī ghaTā meñ chhā.ī haiñ
aa.iye zikr-e-zulf-e-yār kareñ
dil diyā hai to un ke qadmoñ par
zindagānī ko bhī nisār kareñ
jis meñ shāmil hoñ sab rā.īs-o-ġharīb
aisī mahfil ko bā-vaqār kareñ
anjuman tab kaheñ jab 'anjum' ko
aap apnā sharīk-e-kār kareñ