yaqīñ banātā hai koī gumāñ banātā hai

jo aadmī hai alag dāstāñ banātā hai

shikast kartā hai zanjīr-e-ḳhāna-o-mehrāb

aur ek halqa-e-āvārgāñ banātā hai

gil-e-vajūd se kartā hai kasb-e-kūza-e-jāñ

ḳhumār-e-sūd meñ lekin ziyāñ banātā hai

kamāl be-ḳhabarī hai agar baham ho jaa.e

magar ye ziist ko āsāñ kahāñ banātā hai

pas-e-charāġh irāda koī to hai 'āzar'

jo mere sho.ala-e-dil ko dhuāñ banātā hai