añdherī raat hai rasta sujhā.ī de to chaleñ

sar-e-falak koī taara dikhā.ī de to chaleñ

ruke haiñ yuuñ ki salāsil paḌe haiñ paañv meñ

zamīn band-e-vafā se rihā.ī de to chaleñ

kisī taraf se to koī bulāvā aa jaa.e

koī sadā sar-e-mahshar sunā.ī de to chaleñ

safar pe nikleñ magar samt kī ḳhabar to mile

koī kiran koī jugnū dikhā.ī de to chaleñ

abhī to sar pe kaḌī dopahar kā pahra hai

shafaq zamīn ko rañg-e-hinā.ī de to chaleñ