ye māntā huuñ ki sau baar jhuuT kahtā hai
magar ye sach hai vo tum se hī pyaar kartā hai
are vo hogā munāfiq tumhārā yaar nahīñ
har ek baat pe jo haañ meñ haañ milātā hai
kahūñ maiñ achchhā burā yā karūñ koī bakvās
mirā ḳhudā hī to har baat merī suntā hai
muāshare kā baḌā ek alamiya ye hai
yahāñ pe jurm ziyāda faroġh paatā hai
tumheñ zamīñ kā havāla to raas aayā nahīñ
vo āsmān bhalā kis ne jā ke dekhā hai
maiñ us ke hone pe kāmil yaqīn rakhtā huuñ
mire yaqīn pe vo bhī yaqīn rakhtā hai
ai merī huur tirā intizār hai ab bhī
tirā 'vaqār' abhī terī raah taktā hai