girya-e-shab kī shahādat ke liye jāgte haiñ
ye sitāre koī saa.at ke liye jāgte haiñ
ḳhauf aisā hai ki ham band makānoñ meñ bhī
sone vāloñ kī hifāzat ke liye jāgte haiñ
umr guzrī hai tirī sajda-varī meñ lekin
aaj ham apnī ibādat ke liye jāgte haiñ
pahle ham karte haiñ tasvīr meñ uryāñ tirā ḳhvāb
aur phir us kī hifāzat ke liye jāgte haiñ
lafz-dar-lafz paḌhā karte haiñ terī sūrat
rāt-bhar terī tilāvat ke liye jāgte haiñ