use mālūm hai maiñ sar-phirā huuñ

magar ḳhush hai ki us ko chāhtā huuñ

ye bastī kab darindoñ se thī ḳhālī

maiñ phir bhī Thiik logoñ meñ rahā huuñ

jo chāhe vo mujhe be-dām le le

ḳharīdāroñ ke hāthoñ kam bikā huuñ

tirī chāhat bahāna hai yaqīñ kar

ba-har sūrat maiñ ḳhud ko chāhtā huuñ

zarā sun be-niyāz-e-lams sun le

maiñ tujh ko chhū ke ḳhud ko bhūltā huuñ

kahāñ toḌā hai maiñ ne shāḳh se gul

maiñ shāḳh-e-gul pe gul ko māntā huuñ