miloñ ke shahr meñ ghaTtā huā din sochtā hogā
dhueñ ko jītne vāloñ kā sūraj dūsrā hogā
agar mar kar phir uThnā hai to marne kī ḳhushī kyā hai
badan khone kā ġham jiine kī ḳhushiyoñ se sivā hogā
sunā hai ye zamīñ uḌtī phiregī ruuī kī sūrat
tamāshā karne vaalā hī tamāshā dekhtā hogā
maiñ chiḌiyoñ ko ulajhte dekh kar laḌtā samajhtā huuñ
magar sachchā.ī kyā hai ye unhīñ se pūchhnā hogā
tumhārā jism merī aag meñ tap kar nikhartā hai
magar ik roz merā jism ThanDā paḌ gayā hogā
mujhe ḳhushbū lapeTe jism kuchh achchhe nahīñ lagte
magar us ko mirā ḳhālī badan bhī kāTtā hogā