rātoñ ke ḳhauf din kī udāsī ne kyā diyā
saa.e ke taur leT ke chalnā sikhā diyā
kamre meñ aa ke baiTh ga.ī dhuup mez par
bachchoñ ne khilkhilā ke mujhe bhī jagā diyā
vo kal sharāb pī ke bhī sanjīda hī rahā
is ehtiyāt ne use mujh se chhuḌā diyā
jab koī bhī utar na sakā mere jism meñ
sab haal maiñ ne sirf usī ko sunā diyā
apnā lahū nichoḌ ke dekhūñgā ek din
jiine ke zahar ne use kyā kuchh banā diyā